Marlene Dietrich

Marlene Dietrich
Marlene Dietrich en 1961 en una escena d'a cinta Judgment at Nuremberg.
Información personal
Nombre real	Marie Magdalene Dietrich
Calendata naiximiento:	27 d'aviento de 1901
Puesto naiximiento:	Berlín (Imperio Alemán)
Calendata muerte:	6 de mayo de 1992
Puesto muerte:	París (Francia)
Ocupación:	Actriz y cantaire
Conchuche:	Rudolf Sieber (1924-1976)
Fillos:	Maria Riva
Sitio web:	www.MarleneDietrich.org
Premios Tony:
Premio Tony Especial: -1968

Marlene Dietrich (maɐˈleːnə ˈdiːtrɪç, nombre artistico de Marie Magdalene Dietrich), naixida de Berlín (Imperio Alemán) o 27 d'aviento de 1901 y muerta en París (Francia) o 6 de mayo de 1992, estió una actriz y cantaire alemana, que desenrolló a mayor parte d'a suya carrera cinematografica en Estaus Unius, dende os anyos 1930, y se nacionalizó ciudadana estausunidense en 1939.^[1]

Ye considerada como una d'as principals figuras d'o cine, y estió la musa d'o director cinematografico Josef von Sternberg, con qui treballó en cuantas cintas. Una d'as suyas caracteristicas particulars yera la suya voz, que gosan calificar de sensual; ixo, adhibiu a los papels que fació en a primera parte d'a suya carrera cinematografica, fan que sía considerada como un prototipo d'a femme fatale. En 1999 fue esleyida por l'American Film Institute como a nueuena millor estrela femenina de toz os tiempos.

Marlene Dietrich yera una personalidat de firmes conviccions politicas, y o suyo antinazismo yera notorio (de feito, compartiu con muitos d'os alemans exiliaus d'a Republica de Weimar en plegar en o poder Adolf Hitler y convertir-la en una dictadura, o Tercer Reich). Asinas, se negó a tornar en Alemania poco antis d'esclatar a guerra y, en esclatar, estió una artista muit compromesa con a victoria d'os Aliaus. Ixo se manifestó no nomás de parolas, so que tamién en actos: grabó cancions antinazis y antimilitaristas en idioma alemán ta la suya retransmisión, fació actuacions te las tropas aliadas cuasi a lo canto d'o frent de batalla y tenió siempre una firma actitud de refús enta lo nazismo y l'antisemitismo. No dixa d'estar ironico que en Judgment at Nuremberg interpretase a la vidua d'un cheneral alemán executau por crímens de guerra.

D'entre la suya filmografía, se puet destacar belunas d'as suyas cintas, como Der blaue Engel (1930, Josef von Sternberg, con Emil Jannings, Kurt Gerron y Rosa Valetti), The Garden of Allah (1936, Richard Boleslawski, con Charles Boyer, Basil Rathbone y C. Aubrey Smith), Angel (1937, Ernst Lubitsch, con Herbert Marshall, Melvyn Douglas y Edward Everett Horton), Witness for the Prosecution (1957, Billy Wilder, con Tyrone Power, Charles Laughton y Elsa Lanchester), u Judgment at Nuremberg (1961, Stanley Kramer, con Spencer Tracy, Burt Lancaster, Richard Widmark, Maximilian Schell, Judy Garland y Montgomery Clift).

1. ↑ (ca) Marlene Dietrich en a Gran Enciclopèdia Catalana.